الطباعة ثلاثية الأبعاد أو ال 3D Printing تقنية تصنيع لما بتندمج مع مجالات موجودة بتطلع لينا انواع 3D Printers بتقدم خدمة تصنيع لحاجات كتير كان صعب تصنيعها بوسائل التصنيع التقليدية.
واحد من القطاعات اللي ال 3D Printing بتقدم فيها حلول هايلة هي المجال الطبي.
من الأبحاث المهمة في المجال ده هي الطباعة الحيوية او Bio 3D Printing
واللي بيتم فيها طباعة انسجة حية مبنية على عينات من انسجة المريض ويتم دمجها مع حبر حيوي عشان يتم انتاج هيكل Structure نقدر نخلي خلايا الممريض تتكاثر عليه.
والهدف النهائي ان احنا نقدر نوصل انها تتحول لعضو كامل يشتغل بكامل خصائص العضو الأصلي في جسم الانسان.
المحاولات الحالية احرزت تقدم كبير في اخر كام سنة لان قبل الطباعة ثلاثية الأبعاد كان لازم عملية البناء دي تتم بشكل يدوي ودي طبعا كانت حاجة صعبة جدا خاصة مع صغر احجام الخلايا وال structure المطلوب.
ال 3D Printer قدرت أنها تحول العملية دي لعملية اتوماتيك بدقة عالية وبالتالي سرعت عملية التطور كتير وبقينا نقدر نشوف اشكال صبه الحقيقة زي الاذن اللي في صورة هنا مثلا.
طيب امتى هنقدر نستغل الاجزاء دي كقطع غيار للبني ادمين , خاصة ان استخدام دمج خلايا المريض اللي هيتزرع عنده العضو بتقلل فرص رفض العضو المزروع وكمان تصنيع الاجزاء هينهي مشكلة الانتظار الطويلة للمرضى اللي مستنين نقل اعضاء من متبرعين خاصة لو اعضاء بتتنقل بعد الوفاه بس.
الحقيقة ان احنا لسه بنتفرج على ابحاث بس, صحيح قدروا يوصلوا انهم يخلوا عينة من الخلايا تتكاثر في المعمل ويقدروا يحافظوا عليها ويخلوها تكبر وتعيش, لكن في انواع مختلفة من الخلايا يعني خلايا الجلد مثلا مختلفة عن خلايا الاوعية الدموية.
وطبعا عشان يقدروا يصنعوا عضو فيه خلايا مختلفة بوظائف مختلفة من شراين واورده وجلد وخلايا عصبية وخلايا بتقوم بوظائف زي االكبد والكلي والقلب ويتم توصيلها كلها وتشتغل مع جسم الأنسان... فدي عملية معقدة جدا ,,, ممكن ناخد عشرات السنين عشان نشوفها ناجحة على مستوى وحجم كبير ومختلف من الاعضاء.
لكنهم حاسين بتقدم وأنهم ماشين في الأتجاه الصحيح.
فهل هنعيش لليوم اللي نشوف فيه قطع غيار بني ادمين متصنعة بتتباع!؟
قولنا رأيك في الكومنتات
وفي الختام
أحب اضيف ان صحيح العلم بيتطور لكن دايما هيوقف عاجز قدام عظمة الخالق العظيم لينا ولهذا الكون واياته احنا يدوبك بنتعلم نفهم هي ازاي بتشتغل فما بالك ان احنا نقدر نصنع حاجة شبهها.
ربنا جعل لينا اياته عشان نقدر نؤمن بيه واحنا مش شايفينه لما يكون عندنا يقين ان صعب أوي مخلوق معقد زينا يكون اتخلق لوحده او بالصدفة او تمثال او بني ادم زيه يكون قادر يخلقه واحنا لسه مش عارفين هيا بتتعمل ازاي بعد الاف السنين من العلم.
"سَنُرِيهِمْ آيَاتِنَا فِي الْآفَاقِ وَفِي أَنفُسِهِمْ حَتَّىٰ يَتَبَيَّنَ لَهُمْ أَنَّهُ الْحَقُّ ۗ أَوَلَمْ يَكْفِ بِرَبِّكَ أَنَّهُ عَلَىٰ كُلِّ شَيْءٍ شَهِيدٌ (53)" سورة فصلت
لو تحب تعرف اكتر عن الموضوع تقدر تتفرج على الفيديو ده:
ولو عاوز تعرف أكتر عن الشركات اللي شغاله في المجال ده شوف الفيديوهات دي:
من المصادر المفيدة جدا:
وده لينك معهد متخصص في الدراسات دي لو تحب تتعلم معاهم او تستفيد من تبادل الخبرات :
ولو حابب تجرب خدمة طباعة الخلايا, ممكن تستخدم الخدمة دي: