Omar Yousry, 3D Printneer
Mar 16, 20202 min
ايه هي الطباعة ثلاثية الأبعاد أو ال 3D Printing !؟
ويا ترى ايه علاقتها بال Additive Manufacturing !؟
الطباعة ثلاثية الأبعاد أو طباعة المجسمات هي طريقة تصنيع جديدة نسبيا (رغم أنها بدأت في الثمانينات) لكن انتشارها الحقيقي في الاستخدام المنزلي بدأ في العشر سنين اللي فاتوا.
عشان أي وسيلة تصنيع ينفع نقول عليها 3D Printer لازم يتوفر فيها شرطين:
*أول حاجه أنها تكون بتصنع منتج نهائي ثلاثي الأبعاد (3D = 3 Dimensional) يعني ليها طول وعرض وارتفاع
*تاني حاجه أنها بتكون بتصنع بطريقة بناء الطبقات فوق بعض, يعني تصنع طبقه و بعدين تصنع بعديها طبقة تانيه (ممكن فوقها وساعات تحتيها)
ودي علاقتها بال Additive Manufacturing
اللي هو التصنيع بالأضافة, يعني اضافة الطبقات فوق بعضها.
طيب ايه الفرق! مسميات مش أكتر ال 3D Printing منتشر أكتر في أمريكا والعالم
أما ال Additive Manufacturing فهو منتشر في أوروبا كأسم لل 3D Printer
لكن متقلقش, في أوروبا هيفهموك برضه لو قلت 3D Printer لكن هيفهموا أنك بتتكلم على الاستخدام الشخصي في الغالب! لأن مكن المصانع مختلف شويتين عن المنزلي وده هنكلم عليه في بوست تاني.
الكلام ده بينطبق على أي نوع من أنواع الطباعة ثلاثية الأبعاد سواء كان بلاستيك أو معدن أو أسمنت أو حتى منتجات طبيه
وأن شاء الله هنتكلم في بوست جاي عن أشهر أنواع ال 3D Printing!
طيب ليه ال 3D Printing دي عامله قلق كبير كده!؟
الحقيقه أن في ناس كتير شايفه ان الطباعة ثلاثية الأبعاد (3D Printing) هي الثورة الصناعية الجديدة!
وبتدخل كل المجالات وبتطور بصورة سريعة جدا
وكمان سوق البيزنس بتاعها بيكبر بصورة بتفوق التوقعات كل سنه وحاليا تخطى حاجز ال 14 مليار دولار أمريكي
ومش بس كده السوق مفتوح بصورة فظيعه لدخول أي حد يقدر يبدع في المجال ده.
وأهم ميزة أنها بتنقل الصناعة في جزء كبير من المنتجات لداخل بيتك وبتوفر النقل وانباعثات الكربون وفلوس وحاجات تانيه كتير.
لكن هل معنى كده أنها هتقضي على أنواع الصناعة التانية!!؟
أكيد لأ لأنها متقدرش حتى الان تنافس ال Mass Production أو الانتاج بكميات ضخمة
لكن يا ترى الوضع ده هيفضل لحد أمتى!؟
أن شاء الله نعرف مع بعض أكتر في بوست جديد من بوستات OmarYousry, The 3D Printneer